Nú stundar av álvara til kappingarendan. Fimm lið í bestu mansdeildini spæla bara fýra dystir afturat í hesum kappingarárinum. Tá er summarsteðgur. Neistin og KÍF ella VÍF skulu hinvegin spæla tveir ella tríggjar dystir afturat. Finalurnar um føroyameistaraheitið skulu avgreiðast.
Kollfirðingar hava havt kós í finalurnar frá byrjan. KÍF hevur verið nummar tvey so at siga allatíðina, meðan VÍF og Kyndil hava runnið í hølunum.
Kyndil veittraði sínum FM-møguleika farvæl síða vikuskifti. VÍF hevur framvegis møguleikan, men tað er lítið sannlíkt, at vestmenningar fara framum kollfirðingar.
Jan Ottesen og kollfirðingar tóku eitt fet nærri finalunum um vikuskiftið. KÍF vann sum væntað á botnliðnum Team Klaksvík, og VÍF tapti fyri Neistanum. Fimm stig skilja nummar tvey og nummar trý. Átta stig eru eftir at spæla um.
Avgreiðsluspurningur
Team Klaksvík hevur fingið tvey stig í skjáttuna higartil. Tað er góðtikið, nú púra óroyndu klaksvíkingarnir spæla í bestu deildini fyri fyrstu ferð. Sigurin á H71, sum má vera besta úrslitið hjá Team Klaksvík nakrantíð, kom sera óvæntað. Og tað er heldur ikki til at vita, nær klaksvíkingar spæla upp til sítt besta, meðan mótstøðuliðið tekur sær av løttum.
Eftir fáum minttum í badmintonhøllini í Klaksvík fríggjakvøldið var greitt, at Team Klaksvík fór ikki at hótta kollfirðingar hesaferð. Tað skrædnaði millum liðini beinanvegin, og uppgávan hjá heimaliðnum var bara at avmarka tapið.
Úrslitið var 39-21.
Næsta vikuskiftið vitjar VÍF í Kollafirði. Við einum sigri kunnu vestmenningar framvegis liva í vónini um finalupláss. KÍF kann hinvegin kveistra allan iva til viks og staðfesta plássið í finalunum um føroyameistaraheitið.
