Fyrr í dag varðveitti menninir hjá KÍ oddasessin við 4-0 sigri ímóti EB/Streymi.
Í kvøld var dagsskráin hjá KÍ kvinnunum at taka toppin, og tað eydnaðist. Tí er KÍ á odda bæði í Betri deildini hjá monnum og hjá kvinnum.
KÍ kvinnurnar vóru í Gundadali og kappaðust við HB um oddasessin. Tað endaði við, at tær bláu fóru norðuraftur við 1-0 sigri.
Einasta málið varð skorað átjan minuttir undan leikloki. Málskjútti var superveteranurin, 38 ára gamla Ragna Patawary, og uppleggið átti 19 ára gamla Evy á Lakjuni.
Úrslitið ber við sær, at KÍ nú er topplið við 16 stigum. ÍF/Víkingur/B68, sum helt frí hetta vikuskiftið, er næstfremst við 14 stigum, og HB er á triðja plássi við 13 stigum.
Í dag eydnaðist tað greipuvinnarunum í EBS/Skála at vinna fyrstu stigini í ár. Tað var á Skála, har heimaliðið vann 2-1 ímóti B36. Bjarta E. Djurhuus legði heimaliðið framum í sjeynda minutti. Dygst undan steðginum javnaði Sarita Maria Mittfoss til 1-1, og miðskeiðis í seinna hálvleiki skoraði liðformaðurin Birna Tummasardóttir Mikkelsen sigursmálið, so EBS/Skála vann 2-1.
B36 hevur seks stig, og EBS/Skála hevur trý stig.
Um eina viku fær KÍ á norðoyastevnu vitjan av EBS/Skála, og ÍF/Víkingur/B68 fær vitjan av HB.
