KVINNUDAGUR 8. mars: Fyrsta kvinnan, sum fekk fast sæti á løgtingi var Jona Henriksen úr Javnaðarflokkinum. Tað var 20. mars í 1975, tá hon tók sæti sum fast varafólk fyri landsstýrisfólk. Nýtt landsstýri varð skipað í januar í 1975. Tá kundu landsstýrisfólk eisini sita í Løgtinginum, men tað var vanligt, at landsstýrisfólk løgdu løgtingssessin frá sær nakað eftir, at landsstýrið varð skipað. Tað gjørdu Alti Dam, løgmaður, og Jákup Lindenskov, landsstýrismaður, 20. mars í 1975. Tá tók Sverre Midjord av Tvøroyri sæti fyri Atla Dam, sum varð valdur í Suðuroyar valdømi, og Jona Henriksen tók sæti fyri Jákup Lindenskov, sum varð valdur í Suðurstreymoyar valdømi.
Tvær ferðir áður høvdu kvinnur havt sæti okkurt stutt skifti, tá tingmaður hevði farloyvi. Fyrru ferð – og fyrstu fer nakrantíð – var tá Malla Samuelsen í 1964 tók sæti á tingi fyri Marius Johannesen úr Sjálvstýrisflokkinum. Seinnu ferð var tá Karin Kjølbro, sum tá æt Karin Joensen, tók sæti fyri Erlend Patursson eitt skifti í 1971.
Jona Henriksen var tann triðja at taka sæti á tingi, men tann fyrsta, sum fekk fast sæti á Føroya Løgtingi.
Tá løgtingsval var næstu ferð 7. november í 1978, varð Jona Henriksen vald á ting fyri Javnaðarflokkin, og tað var Karin Kjølbro úr Tjóðveldisflokkinum eisini. Tað er fyrstu ferð, at kvinnur er valdar beinleiðis á ting – og síðani tá eru kvinnar valdar á ting á hvørjum vali, men ikki so nógvar sum menn – og so langt burturfrá: Tilsamans hava føroyingar bara valt 28 kvinnur á ting. So um allar kvinnur, sum eru valdar á ting síðani 1975, møttu upp, so vóru tær ikki nóg nógvar at manna Løgtingið, sum hevur 33 løgtingsfólk.
Kvinnur á tingi í tíðarrøð:
| 1 | Jona Henriksen | (C) | 1978-1980 |
| 2 | Karin Kjølbro | (E) | 1978-1990 |
| 3 | Marita Petersen | (C) | 1988-1998 |
| 4 | Jóngerð Purkhus | (E) | 1988-90 |
| 5 | Helena Dam á Neystabø | (D) | 1990-2002 og (C) 2008-2011 |
| 6 | Lisbeth L. Petersen | (B) | 1990-2008 |
| 7 | Ingeborg Vinther | (G) | 1994-1998 |
| 8 | Maria Hansen | (B) | 1994-1998 |
| 9 | Katrin Dahl Jakobsen | (C) | 1998-2004 og 2008-2011 |
| 10 | Annita á Fríðriksmørk | (E) | 1998-2011 og 2015- |
| 11 | Kristina Háfoss | (E) | 2002-2004 og 2011- (fór í farloyvi í 2020) |
| 12 | Heidi Petersen | (E) | 2004-2008 |
| 13 | Bergtóra Høgnadóttir | (E) | 2008-2011 |
| 14 | Rósa Samuelsen | (B) | 2008-2011 og 2019- |
| 15 | Bjørt Samuelsen | (E) | 2008-2015 og 2019- |
| 16 | Annika Olsen | (A) | 2008-2019 |
| 17 | Elsebeth Mercedis Gunnleygsdóttur | (A) | 2011- |
| 18 | Sirið Stenberg | (E) | 2011- |
| 19 | Edva Jacobsen | (B) | 2011-2015 |
| 20 | Gunvør Balle | (E) | 2011-2015 |
| 21 | Eyðgunn Samuelsen | (C) | 2011-2019 |
| 22 | Rigmor Dam | (C) | 2011-2019 |
| 23 | Hanna Jensen | (F) | 2015-2019 |
| 24 | Katrin Kallsberg | (E) | 2015-2019 |
| 25 | Sonja Jógvansdóttir | (C) | 2015-2019 |
| 26 | Beinta Løwe | (E) | 2019- |
| 27 | Hervør Pálsdóttir | (E) | 2019- |
| 28 | Ingilín Didriksen Strøm | (C) | 2019- |
29 Eykafólk: Hildur Patursson 1993-94
30 Eykafólk: Jóna Mortensen 2011-2015
31 Eykafólk: Kristianna Winther Poulsen 2013 og 2015-2019
32 Eykafólk: Óluva Klettskarð 2015-2019
33 Eykafólk: Rúna Sivertsen 1998-2004
34 Eykafólk: Ruth Vang 2015-
Eykafólk omanfyri er kvinnur, sum hava havt fast sæti fyri landsstýrisfólk, men sum ikki eru valdar á ting. Onkrar av kvinnunum, sum hava verið valdar á ting, hava eisini sitið sum varafólk okkurt skeið. Viðmerkjast skal, at Ruth Vang, sum var eykafólk fyri valið, og sum ikki varð vald á valinum, nú hevur fastan tingsess. Tað hevur hon, tí Poul Michelsen hevur sagt tingsessin frá sær. Hann kann ikki møta aftur á tingi.
