Hvussu fyrireikar tú teg til jólini – ella koma jólini bara, tá tey koma?
- Heima hjá mær er ikki nógv jólastress, nú børnini eru vaksin, og eg eingi ommubørn havi fingið enn.
Tað sigur Rúna Heðinsdóttir, sum er ættað úr Leirvík og býr í Randers.
Hevur tú pyntað til jólar og gert tú nógv burturúr?
- Eg plagi at pynta 1. sunnudag í advent - við jólaperum og jólastjørnum í næstan øllum vindeygum.
Hon sigur, at hon hevur adventskrans, jóladekoratiónir og annað jólapynt, eitt nú einglar og jólakrubbu í íbúðini.
Hava tit jólatræ – úr plasti ella træi - og nær verður jólatræið pyntað?
- Jólatræið er úr plasti og er eftirhondini eini 20 ára gamalt. Tað verður eisini pyntað 1. sunnudag í advent.
Hon sigur, at jólatræið er sera litríkt við eini rúgvu av pynti og litaðum jólaperum.
Ert jólagávurnar keyptar?
- Familjan er ikki stór, so eg skal bara keypa jólagávur til sjey fólk. Gávurnar, sum skuldu sendast heim til Føroya, komu í fyrstu røð.
Rúna Heðinsdóttir sigur, at hinar jólagávurnar verða helst keyptar fyri 20. desember.
- Eg eri so heppin, at øll míni børn og ein av mínum svigardøtrum halda jól heima hjá mær í ár. So, eg gleði meg at halda jólaaftan saman við teimum.
- Gleðilig jól, øll somul! er heilsanin úr Danmark.
