Síðsti heiðurin á ítróttafagnaðinum hjá ÍSF í kvøld var heiðursskjal Poul E. Petersen, sum heiðrar einum fólki, sum á serstakan hátt og yvir eitt longri tíðarskeið hevur tænt føroyska ítróttinum.
Heiðursskjalið varð hesaferð latið til Johonnu Troest, sum var við til at seta fimleikafelagið Støkk í Runavík á stovn fyri 55 árum síðani, og hevur veitt lívlanga tænastu fyri felagið, har hon verður sædd sum ein fyrimynd.
Hóast 80 ára gomul, so er Johanna Troest framvegis virkin.
- Eg ætli mær ikki at gevast enn. Eg ætli mær at halda fram so leingi sum eg orki, men tað gongur bara ikki so væl beint nú, segði Johanna vísandi til sína nýliga skiftu mjødn.
Maður Johonnu Troest, Kaj Aage Troest, sum andaðist herfyri, hevur eisini áður fingið heiðursskjal Poul E. Petersen. Tað fekk hann í 2002.
Heiðursskjøl Poul E. Petersen:
2001: Birgit Hestoy, svimjing
2001: Niels Jákup Jakobsen, frælsur ítróttur
2002: Kaj Aage Troest, fimleikur
2004: Jógvan á Lað, fótbóltur
2018: Guttormur Sørensen, frælsur ítróttur
2019: Peter Hentze Niclasen, borðtennis
2020: Súsanna "Ussa" Krossteig Hansen, hondbóltur
2021: Johanna Troest, fimleikur
