Tað gongur fínt hjá føroyska Jóhan Egholm Hansen, sum spælir hondbólt í fremstu røð í Danmark.
Síðsta dømið um góðu gongdina hjá føroyska spælaranum í Bjerringbro-Silkeborg var í dag. Tá spældu Jóhan og liðfelagarnir í EHF kappingini í Sveis. Mótstøðuliðið var Pfadi Winterthur.
Danska liðið vann 28-25, og Jóhan Egholm Hansen, sum fyri tað mesta spælir á høgra veingi, átti sín týdningarmikla leiklut í sigrinum, tí hann skoraði fýra mál.
Hetta var aðru ferð, at Jóhan Eghom Hansen var við í dysti í EHF kappingini. Fyrri dysturin var fyri viku síðani ímóti St. Raphael, sum er næstfremst í fronsku landskappingini. Tá var úrslitið 31-26 sigur til Bjerringbro-Silkeborg. Eisini ta ferðina var føroyski spælarin eyðsýndur. Hann skoraði fimm mál.
