Sambært útsøgnunum hjá Gerhardi Lognberg, so ætlar hann sær annaðhvørt í Miðflokkin ella í Sambandsflokkin. Hann hevur í fleiri samrøðum sagt, at málið um at víga samkynd hevur havt størstan týdning, nú Javnaðarflokkurin valdi at koyra hann úr flokkinum.
Hóast hetta man vera ein gudiligur sannleiki við rættiliga stórum modifikatiónum, so er tað júst gudstrúgvin, sum kann tryggja Gerhardi Lognberg ein sess millum Jens og Bill í løgtinginum. Í Miðflokkinum er vítt til veggja og høgt til loftið, tá tað snýr seg um politikk. Tú kanst verða sosialistur, sum Jenis og fólkafloksmaður sum Bill og so alt, sum har ímillum. Bara tú trýrt upp á Gud, so er pláss í Miðflokkinum, tí tað er jú tað, sum tað heila snýr seg um, sambært teimum.
Vilja teir kortini ikki hava Gerhard, so hevur hann eisini gloppað dyrnar í Sambandsflokkinum eitt nú við at tosa so pent um løgmann.
Men ávirkan fær Gerhard kortini ikki. Andstøðan stendur helst sterkari, um færri standa saman.
Samgongan hevur ríkiligt av atkvøðuneytum frammanundan, tí Fólkaflokkurin hevur longu reinan meiraluta á tingi.
