Støðan hjá ungum monnum og spurningurin um, hvussu avbjóðingarnar í húsarhaldi og arbeiðslívi kunnu samantvinnast verða viðgjørdi á tiltaki hjá Javnstøðunevndini í Klaksvík hóskvøldið klokkan 19.30 til 21.
Hvussu ber til at fáa avbjóðingarnar í húsarhaldi og í arbeiðslívi at ganga upp í eina hægri eind?
Hvussu er støðan hjá ungum monnum í Føroyum? Og hvørji evni eiga at verða tikin við í arbeiðið fyri javnstøðu í føroyska samfelagnum?
Hesir og aðrir spurningar, sum viðvíkja javnstøðu millum kyn, verða viðgjørdir á almennum tiltaki í Leikalund í Klaksvík hóskvøldið 30. september.
Á skránni verða tvær framløgur.
Ein framløga hevur heitið Arbeiðslív, húsarhald og javnstøða, og tað er Karin Jóhanna L. Knudsen, sum heldur hana. Karin Jóhanna er granskari og í starvi hjá Granskingardeplinum fyri Økismenning.
Hin framløgan hevur heitið Fortíðarinnar hetjur í andróðri ? maskulinitetur og samleiki hjá ungum monnum í Føroyum. Hesa framløguna heldur Firouz Gaini, granskari og lektari á Fróðskaparsetri Føroya.
Síðani verður møguleiki fyri orðaskifti um tær avbjóðingar, sum eru á javnstøðuøkinum í føroyska samfelagnum.
Endamálið við tiltakinum er at skapa áhuga fyri javnstøðu millum kyn og at viðgera javnstøðuspurningar frá ymsum sjónarhornum.
Tiltakið er alment og ókeypis og verður í Leikalund í Klaksvík hóskvøldið 30. september klokkan 19.30 til 21.
Vónandi møta nógv fólk.
