Í dag fáa umsøkjarar til lestrarpláss á bachelorútbúgvingini í sjúkrarøktarfrøði svar frá Lestrarskrivstovuni, skrivar setur.fo.
Útbúgvingin í sjúkrarøktarfrøði á Deildini fyri heilsu- og sjúkrarøktarvísindi á Fróðskaparsetrinum fær nú 24 nýggj lesandi á fyrsta semestri, um øll taka av.
Lestrarskrivstovan hevur í seinastuni viðgjørt tær 30 umsóknirnar, sum komu inn til vetrarupptøkuna, og 24 fáa í dag tilboð um lestrarpláss.
Freistin at taka av lestrarplássinum skal vera Fróðskaparsetrinum um hendur í seinasta lagi á midnátt mikudagin 7. januar.
Eru tøk lestrarpláss eftir tað, verða tey lýst leys at søkja.
Innleiðsla fyri tey nýggju lesandi verður mánamorgun 26. januar 2026.
Lesið meira um útbúgvingina her.
