Rokfiskiskapur
Trolararnir, sum royna eftir upsa, fáa nógvan fisk.
Hetta er einki nýtt, tí fiskiskapurin hjá trolarunum hevur verið góður í longri tíð.
Men nú ber av...
Trolararnir, Jaspis og Ametyst, sum vóru leingi úr vinnu í fjør, tí teir vórðu sandblástir og nútímansgjørdir, hava gjørt tað óføra væl, síðan teir komu aftur úr Danmark.
Ikki minst seinastu tíðina hava teir rættiliga rokast.
4 ferðir í 14 dagar
Virkisleiðarin á Fiskavirking í Saltangará, Jason Johannesen, ásannar, at hann í síni longu tíð, sum virkisleiðari og stjóri á fiskavirkjum, neyvan veit um slíkan fiskiskap at siga.
- Jaspis og Ametyst vóru inni mánadagin í hesi vikuni, fullir undir lúkurnar, og longu hósdagin vóru teir inni aftur ? skítfullir, sum hann tekur til.
Jason sigur, at skipini hava landað fýra ferðir seinastu 14 dagarnar, og lastin hevur verið á tremur hvørja ferð.
- Úr minninum veit eg, at teir landaðu, 19. februar, 24. februar og nú aftur, 27. februar.
Í gjár høvdu Jaspis og Ametyst eini 200.000 pund av upsa og eini
30.000 pund av øðrum fiskasløgum.
Fiskavirking í Saltangará, sum í hesum førinum keypti allan upsan
frá báðum skipunum, landaði annað skipið, og Snodd á Toftum
landaði hitt.
Seinasta leygardag keypti Fiskavirking í Saltangará út við 40.000 pund av upsa frá Smaragd og Safir. Annar landaði á Snodd, hin í Hvalba.
Prísurin lækkaður
Jason Johannesen sigur, at upsin framvegis er smáur, hóast tað gongur ímóti gýtingartíð.
- Vit plagdu at siga, at vanligur, men ikki stórur upsi, lá um 2,2-2,3 kg., men tað mesta, vit fáa í dag, liggur um 1,6-1,7 kg. So, hetta er rættiliga smáur fiskur, sum tekur langa tíð at arbeiða.
Av tí, at fiskurin er smáur, sigur hann, so gongur tað eisini út yvir dygdina á vøruni.
- Talið av fiski er stórt, og tað tekur sína tíð at arbeiða eina stóra last undan, sigur Jason Johannesen.
Hann vísir á, at prísirnir á tí smáa upsanum eru lækkaðir nakað í
seinastuni, meðan prísurin á tí frægara fiskinum heldur sær.
- Alt hevði verið øðrvísi, um fiskurin var størri, sigur virkisleiðarin á Fiskavirking í Saltangará.
