6-MANNAFØR KVINNUR
Jóannes Hansen
Annan leygardag verður tað kappróður í Miðvági. Miðvingar hava ikki staðið seg nakað serliga væl í kappingini í ár. Á mannfólkasíðuni eru teir púra sørir. Á kvinnusíðuni hevur tað gingið betri og betri hjá Riddaranum.
Á jóansøku var Riddarin aftur næstfremstur. Nú hevur Riddarin sama stigatal sum Páll Fangi, og um tær síðstu kappingarnar skulu nýtast sum grundarlag fyri metingunum um komandi kappingarnar, so má Riddarin metast at vera favorittur til at vinna silvurmerkini.
Jarnbardur er so at siga FM vinnari, og aftur í Vági sýndu kvinnurnar í róðrarfelagnum Knørri, at tær eru so nógv best fyri í ár. Veteranurin í rongini, Jannie D. Jacobsen, eigur kanska ikki so nógva rødd eftir, men hon megnaði so at píska sína manning til sama avrikið, sum tær hava sýnt í øllum hinum kappingunum.
Á málinum var Jarnbardur eina bátslongd frammanfyri Riddaran, sum aftur var eina bátslongd undan Gongurólvi. Hesir fýra bátarnir róðu so at siga í einari kapping fyri seg sjálvar. Lómur, Snopprikkur, Víkingur og Hvessingur vóru væl aftari.
FM spurningurin tykist vera avgreiddur. Spenningurin nú snýr seg um, um tað fer at eydnast Riddaranum í heimasjógvi at gera nakað við Jarnbard!
