Tólv dagar eftir at ein amerikanskur hermaður bleiv skuldsettur fyri at hava neyðtikið eina 14 ára gamla japanska gentu á oynni Okinawa, er ein annar amerikanskur hermaður skuldsettur fyri at hava neyðtikið eina 21 ára gamla kvinnu á somu oyggj. Kvinnan, sum er ættað av Filipsoyggjunum, varð neyðtikin á einum hotelli mánadagin, skrivar japanska tíðindastovan Kyodo.
USA hevur 40.000 hermenn í Japan, og helmingurin av teimum hava støð á oynni Okinawa. Amerikanararnir hava yvirhøvur verið væl lýddir á oynni, men tær báðar neyðtøkurnar hava fingið øði í fólk, og altsamt fleiri vilja hava teir amerikonsku hermenninar burtur haðani.
Tíðindini um tær báðar neyðtøkurnar hava eisini fingið øði í fólk aðrastaðni í Japan, og í høvuðsstaðnum Tokyo hava fólk gingið kravgongu við kravi um, at teir fremmandu hermenninir skulu koyrast av landinum.
Málið hevur eisini fingið nógva politiska umrøðu, og Yasuo Fukuda, forsætisráðharri, hevur sagt, at hann fer at taka málið fram, tá Condoleezza Rice, uttanríkisráðharri, kemur til Japan í næstum.
