Føroyski landsliðsleikarin, Jana Mittún spældi í kvøld sín fyrsta almenna kappingardyst í donskum hondbólti.
Jana og liðfelagarnir í Viborg ferðaðust í kvøld til Nørresundby norðanfyri Aalborg fyri at spæla áttandapartsfinalu í donsku steypakappingini móti EB Aalborg.
Viborg vann seg trygt víðari til fjórðingsfinalurnar við einum 33-22 stórsigri. Í steðginum var Viborg á odda 14-9.
Jana slapp upp í part og skoraði síni fyrstu tvey mál í einum kappingardysti fyri Viborg. Haraftrat legði Jana upp til tvey onnur mál.
Fríggjakvøldið 1. september spælir Viborg fyrsta dystin í bestu donsku deildini hetta kappingarárið. Tá kemur Horsens á vitjan í Viborg.
