Føroyska manslandsliðið í hondbólti fór í dag í eldin í Emerging Nations Championship í Kosovo.
Fyrsti dysturin ímóti Avstralia, sum hevur Jan Ottosen (myndin), sum venjara, og Kristoffer Karlson hjá KÍF, og Tommy Fletcher hjá Neistanum á liðnum endaði við javnleiki 34-34, sum sæð í mun til dystargongdina var eitt minni gott úrslit fyri Føroyar.
Føroyar vóru rættiliga trygt á odda 33-29, tá liðini fóru í holt við seinastu fimm minuttirnar av dystinum. Tíverri søplaði føroyska liðið leiðsluna burtur, og Avstralia vann seg uppá javnleik 34-34, sum gjørdist endaliga úrslitið.
Føroysku málskjúttarnir vóru hesir: Áki Egilsnes 8, Rókur Akralíð 7, Tróndur Kragesteen 7 (4), Rósing Rasmussen 6, Andrias Eriksen 3, Jóannes Prestá 1, Tony Weyhe 1, Mikkjal Hansen 1.
Kosovo vann heili 60-17 á Armenia. Í morgin klokkan 12.30 spæla Føroyar ímóti Armenia, og skuldu vánirnar fyri einum sigri verið heilt góðar.
