- Eg eri ikki keddur, ei heldur vónbrotin. Skal man ganga fornermaður í einum slíkum starvi, gerst tú ikki gamal sum formaður í Fiskimannafelagnum. Teir fýra limirnir í Fiskimannafelagnum, sum fyrr í heyst vórðu burturvístir úr felagnum, hava nú fingið bræv um, at burturvísingin er tikin aftur.
Jan Højgaard, formaður í Fiskimannafelagnum, sigur, at hann tók avgerðina um at burturvísa monnunum eftir bestu sannføring og í samráð við ein meiriluta í leiðslu felagsins.
Hann sigur, at hann hevði telefonsamskifti við menn í leiðsluni, og tá hann tók avgerðina, var hann í teirri trúgv, at hann hevði ein meiriluta aftanfyri seg.
Hesin meiriluti skuldi tó vísa seg ikki at vera til steðgar, tá samanum kom.
Á fundi í Fiskimannafelagnum í seinastu viku avgjørdi nevndin at annulera burturvísingina og taka menninar innaftur í felagið.
- Eftir nevndarfundin hava vit eina nýggja støðu sum ber við sær, at burturvísingin er tikin aftur, og teir fýra menninir hava nú fingið bræv um, at teir eru limir aftur í felagnum, sigur hann.
Spurdur, hvussu tað kennist at noyðast at boyggja seg í hesum máli, sigur Jan Højgaard:
- Eg eri ikki keddur, ei heldur vónsvikin. Skal man ganga fornermaður í einum slíkum starvi, gerst tú ikki gamal sum formaður í Fiskimannafelagnum, sigur Jan Højgaard.
Menninir, sum vórðu burturvístir og seinni tiknir innaftur í felagið, eru teir, sum á sinni mynstraðu við Carlton í trætuni millum Fiskimannafelagið og felagið í Klaksvík, sum átti skipið.
