Jan Dam heldur fram í Sundalagnum

EB/Streymur hevur boðað frá, at felagið hevur longt sáttmálan við Jan Dam sum venjara hjá næstbesta liðnum. Hann megnaði í undanfarna kappingarárinum at flyta EB/Streym upp í 1. deild.

- Jan kom til felagið við kappingarbyrjan í 2021 og fer tí undir triðja árið sum venjari á næstbesta liði felagsins. Komandi ár skal liðið spæla í 1. deild, og tað verður við Jan við róðrið, at okkara spælarar skulu stríðast fyri at halda sær í deildini, skrivar EB/Streymur og leggur afturat:

- Vit hava fleiri evnaríkar ungar spælarar á veg upp, og við drúgvu royndunum hjá Jan í føroyskum fótbólti, serliga innan ungdómin, so ivast vit ikki í, at framhaldandi menningin av hesum komandi stjørnum er í tryggum hondum.

EB/Streymur bleiv nummar trý í 2. deild, men flytir upp, tí Skála á øðrum plássi kann ikki flyta upp.