Pengarnir, sum skuldu brúkast til at gera veg í Leirvík til Norðoyatunnilin, verða brúktir aðrastaðni í Eysturoynni Tað upplýsti Bjarni Djurholm, landsstýrismaður, í Løgtinginum fyrrapartin.
-Í Leirvík hendir millum lítið og einki, og tí verða pengarnir, sum skuldu verið brúktir til vegaføring har, brúktir til aðra vegagerð í Eysturoynni, segði landsstýrismaðurin, tá hann svaraði einum spurningi hjá Kára P. Højgaard, sum vildi hava at vita, um játtanin verður brúkt og til hvat.
Á fíggjarlógini í ár eru 18 milliónir settar av til at gera veg til Norðoyatunnilin Leirvíkarmegin.
Undir orðaskiftinum fíltust summir tingmenn á, at tað enn ikki er eydnast at finna eina loysn á drúgvu trætuni um tunnilsegin í Leirvík, og at viðurskiftini viðvíkjandi ognartøku framvegis ikki eru komin uppá pláss.
