Tað var tann 21. november, at hann fekk eitt prik her á síðuni, eftir at tað var komið fram, at ein persónur á hansara lista hevði svikið hann. Rólant er valdur á lista A, sum fekk fýra av sjey bygdarráðslimum á Eiði á valinum hesaferð.
Men Jógvan í Skorini, sum er valdur á sama lista, valdi at ganga saman við lista C, sum soleiðis fekk meirilutan, og Jógvan í Skorini verður borgarstjóri.
Sambært tí, sum stóð her á síðuni, so hevur Rólant Poulsen sjálvur verið við til slíkt svik fyrr – í 2000, tá hann varð valdur á lista saman við Tordi J. Niclasen.
Men sambært Rólanti Poulsen, so hevði hann einki við hendan rossahandilin at gera.
– Eg visti einki um handan rossahandilin hjá Tordi Niclasen, sum hann hevði gjørt við Knút Vesturdal, sigur Rólant Poulsen.
Við valið í 2000 vórðu Rólant Poulsen og Tordur Niclasen valdir á lista B. Tordur fekk 53 atkøður og Rólant 32. Men tveir av limunum á hinum listanum gingu saman við teimum, og Tordur Niclasen varð valdur til borgarstjóra.
– Eg var sum sagt púra óvitandi um hatta. Nú hava vit fingið ein kverulant til borgarstjóra, sum er hoppaður av okkara lista, sum vann valið, sigur Rólant Poulsen.
Listi A hjá Rólanti Poulsen fekk 223 atkvøður og fýra limir valdar, meðan listi C fekk 196 atkøvður. Rólant Poulsen fekk 66 atkvøður, meðan Jógvan í Skorini fekk 47.
– Tað er alt avbygdafólk, sum nú eru í meirilutanum, sigur Rólant Poulsen, sum ikki dylir, at hann heldur sera lítið um framferðarháttin hjá Jógvani í Skorini.
– Eg eri sera skuffaður av hesum, og har verður einki gott samstarv millum meg og meirilutan. Eg siti nú púra uttan ávirkan, eri bara valdur í eina undirnevnd undir vinnunevndini, tey kalla havnarnevnd, sigur Rólant Poulsen, sum er sera skuffaður – og sum leggur dent á, at so víst er slíkur framferðarháttur, sum hesin, óhoyrdur á Eiði.
– Eg ivaðist, um eg skuldi stilla uppaftur. Hevði eg vitað av hesum, so hevði eg ikki stillað uppaftur, sigur hann.
