Sambært samgonguskjalinum, so skulu hesar 16 milliónirnar mótroknast teimum 9 – og so verður úrslitið negativt. Alt annað líka, so átti tað at merkt, at blokkstuðulin ikki hækkar eitt oyra.
Men hóast bæði Kári Post og Jenis av Rana skilja samgonguskalið soleiðis, sum skrivað stendur, so hevur løgmaður onkra aðra frágreiðing.
Tað er tí, at vit fegin vildu fingið svar frá Jørgen Niclasen um hetta mál, men hann vil ikki svarað, hóast vit hava fingið orðið á hann.
Á landsfundi hjá Fólkaflokkinum 26. november boðaði Jørgen Niclasen frá, at tað als ikki var vist, at ríkisveitingin fór at hækka:
Hann vísti á nevndu orðing í samgonguskjalinum og staðfesti, at undir vanligum umstøðum, við vanligum inntøkuvøkstri í landskassanum, fer danska ríkisveitingin ikki at veksa.
Og so kom hann til poengið við hesi orðingini:
– Í veruleikanum verður úrslitið, at eisini framyvir verður ríkisveitingin akkurát líka fastfryst, sum hon hevur verið seinastu árini.
Vit vildu fegin fingið Jørgen Niclasen at svarað okkum uppá, um blokkstuðulin hækkar, og um tað er í tráð við samgonguskjalið og politikkin hjá Fólkaflokkinum – ella um hetta er ein av kamelunum, sum Fólkaflokkurin nú skal svølgja.
