Dómarin valdi av onkrari orsøk, ikki at steðga dystinum beinanvegin. Tá hann so steðgaði dystinum mátti Jónas Tór Næs av vøllinum og í umklæðingarrúmið at seymast í yvirmunninum. Meðan Jónas var uttanfyri skoraði Svøríki til 1-1.
- Eg skilji ikki hví dómarin ikki steðgaði dystinum, sigur Jónas Tór Næs, sum fór á skaðastovuna eftir dystin.
- Eg síggi bara at eg fái ein alboga í høvdið. Eg havi ikki sæð støðuna umaftur, men sum eg minnist, so kundi tað gott verið eitt reytt kort, sigur Jónas.
Fyri trimum viku síðani royndi Jónas nakað líknandi í dysti í Íslandi.
- Har fekk eg eisini ein alboga í høvdið, men eg fekk væl spælt víðari, so tað klári eg eisini hesaferð, sigur Jónas avgjørdur á málinum.
Zlatan Ibrahimovic var skjótur at útnytta, at Jónas ikki var á vøllinum.
- Hann veit at tað manglar ein leikari har, tí hann spælir bóltin í blindum út í hasa síðuna, sigur ein argur Jónas Tór Næs.
Jónas Tór Næs letur annars væl at avrikinum í kvøld og ikki minst av áskoðarunum á Tórsvølli í kvøld. Sostatt verður Jónas klárur til dystin týskavøldið móti Írlandi.
trondur@sosialurin.fo
