Á framsýningini verða alskyns grafikkur, málningar og installatiónir at síggja. Listasavnið gevur samstundis út bók um listakvinnuna, sum listfrøðingurin Eva Furseth hevur skrivað. Bókin er á føroyskum, norskum og enskum.
Jóna Rasmussen (f. 1946) er ein fjølbroytt listakvinna. Hon málar og granskar alskyns grafiska tøkni. At tað, ið Jóna Rasmussen letur úr hondum, er latið í nógvar ólíkar listabúnar, ber boð um eina listakvinnu, sum ikki hevur hug altíð at standa í sama staði, men verður nú sum fyrr drivin av forvitni og ævintýrhugi. Verkini eru mangan arbeidd sum røðir av slíkum myndum, har broytingar sipa til ringrørslur, og reikandi formar teirra menna seg alsamt. Komnir aftur til upprunan eru teir vorðnir øðrvísi. Eins og menniskjað í samfelagnum broytist gjøgnum upplivingar, samstundis sum at lívið endurtekur seg í dagar, ár, ættarlið og tíðarskeið. Tað ekspressiva í verkunum rennur saman við ein fínligan sans fyri tí einfalda og nærum minimalistiska. Myndevnini verða skorin inn á bein, samstundis sum hon varðar um tað sansaliga og ábendandi. Júst samspælið millum teir ætlandi pólarnar gevur eina huglagsmettaða uppliving. Jóna Rasmussen hevur frá fyrstantíð havt eina serstaka myndsøgn og verið eitt av listafólkunum, sum settu fyridømi í føroyskari list.
Martin Næs, stýrisformaður Listasavns Føroya, letur framsýningina upp. Sigrið Rasmussen luttekur við sangi.
