Jólagávur frá Tvøroyrar Býráð

Finnleif Guttesen

Sum einasta kommuna í landinum, ið ikki rindar avdrøg upp á 72 milliónir í skuld og hækkar skattaprosentið til 23,5, kunnu borgararnir í kommununi vænta sær meira enn eina plastiktasku, og býráðslimir ein klædning, í jólagávum komandi árini, sigur Finnleif Guttesen, fyrrverandi borgarstjóri á Tvøroyri

Eftir lánsavtaluni, ið var gald­andi til november 2005, hevði skuldin hjá kommununi verið áleið 64 milliónir krónur við árslok. Nú verður upplýst, at skuldin er 72 milliónir krónur, so her er okkurt spinnandi galið, tí kommunan hevur ikki loyvi til at lána og harvið hækka sína skuld, og tað sær eisini út til, at býráðið bert ætlar at gjalda rentur av skuldini tey komandi 5 árini. Eftir 10 árum er ætlanin, at skuldin skal verða komin niður á eina álíkning, umleið 44 milliónir krónur.
Býráðslimir hava við hes­ari avtalu, tveitt ábyrgd frá sær og latið upp til okkara børn og abbabørn, um at gjalda gildið.
Borgarstjórin tosar nógv fyri, at Suðuroy skal verða ein kommuna, og um tað er fyri at fáa hinar kommunurnar í oynni at átaka sær skuld hjá Tvøroyrar kommunu skal verða ósagt, men tað má verða ein herskin biti hjá hinum kommununum at slúka.
Men sjálvsagt kunnu hin­ar kommunurnar slúka hend­an kamel, um Tvøroyr­ar kommunu, ið fær 10 milliónir meira um árið til nýtslu, brúkar hesar millión­ir fyri alla oynna. Til dømis ellis­heim í Vági , reint vatn, reinar kloakkir o. a. á Tvøroyri, næmingaheim, svimjihøll og fótbóltsvøll í Hovi.
Tíðin fer at vísa suður­oy­ing­um, um býráðslimir á Tvøroyri eru so mikið at sær komnir, at teir megna og hava dirvi til, at síggja út um bøgarðarnar.