Inlendismálið hevur gjørt av at seta Jóhonnu Olsen í starv sum stjóri á Umhvørvisstovuni.
Jóhanna Olsen er útbúgvin cand.scient í lívfrøði. Harumframt hevur hon tikið masterútbúgving í umhvørvismeting við høvuðsritgerð um lendisplanlegging í Føroyum.
Jóhanna Olsen hevur drúgvar fyrisitingarligar royndir. Seinastu fýra árini hevur hon verið deildarleiðari á Umhvørvisstovuni. Áðrenn hetta starvaðist hon í átta ár á Heilsufrøðiligu starvsstovuni sum umhvørvisviðgeri og deildarleiðari.
Jóhanna Olsen byrjar í starvinum tann 1. august í ár.
