Í tíðindaskrivinum verður gjørt greitt, at sjúkrahúsleiðslan fer ikki at at mæla til, at Jóhan Petur Davidsen verður uppsagdur sum tænastumaður á Landssjúkrahúsinum. Hann fer sostatt at halda áfram sum vanligur yvirlækni.
Í tíðindaskrivinum verður sagt soleiðis um gongdina í málinum:
Leiðslan á Landssjúkrahúsinum hevur avgjørt, at Jóhan Petur Davidsen, verður settur frá sum leiðandi yvirlækni á Skurðdeplinum og samstundis hevur hann fingið fráboðan um eina ávaring. Men sjúkrahúsleiðslan fer ikki at mæla til, at Jóhan Petur Davidsen verður uppsagdur sum tænastumaður á Landssjúkrahúsinum.
Hann fer sostatt at halda áframm sum vanligur yvirlækni.
Orsøkin til, at sjúkrahúsleiðslan tók stig fram ímóti at siga táverandi leiðandi yvirlæknanum á kirurgiska deplinum úr starvi, bæði sum leiðari og tænastumaður, er at leiðslan á ongan hátt vil góðtaka ein slíkan leiðsluatburð, sum tann, ið leiðandi yvirlæknin vísti. Ein av atvoldunum til trupulleikarnar á Landssjúkrahúsinum er, at tað mangan er stríð um, hvør hevur rættin at taka yvirskipaðar avgerðir á stovninum. Hetta máar støðið undan einum vælvirkandi stovni, og tað kann sjúkrahúsleiðslan ikki góðtaka. Sjúkrahúsleiðslan hevur lagt seg eftir at víst ein opnan leiðslustíl, har øll starvsfólk verða hoyrd og vird. Men tá komið er fram til eina avgerð, so skal hon virðast, og allir leiðarar hava skyldu til at virka fyri at fremja avgerðir í verki innan fyri síni øki. Hesa skyldu hevur leiðandi yvirlæknin á kirurgiska deplinum ikki livað upp til.
Jóhan Petur Davidsen varð tískil sendur til hús 24. oktober við einum ætlanarskrivi um at heita á landsstýrismannin í almanna- og heilsumálum um at siga hann úr tænastumannastarvi á Landssjúkrahúsinum. Sjúkrahúsleiðslan vil í hesum sambandi sláa fast, at Jóhan Petur Davidsen ongantíð formliga er blivin uppsagdur, soleiðis sum stundum hevur verið ført fram í fjølmiðlunum. Jóhan Petur Davidsen fekk 14 dagar til at koma við einum hoyringssvari, og hetta svar var Landssjúkrahúsinum í hendi 4. november.
Sjúkrahúsleiðslan hevur nú viðgjørt málið og hevur avgjørt at broyta upprunaligu ætlan sína. Hetta er gjørt út frá eini heildarmeting av málinum, har sjúkrahúsleiðslan ikki metir, at løgfrøðiligt grundarlag er fyri at siga Jóhan Petur Davidsen úr starvinum sum tænastumann.
Hoyringssvarið broytir tó einki upp á støðuna hjá sjúkrahúsleiðsluni um, at Jóhan Petur Davidsen ikki kann halda áfram sum leiðandi yvirlækni á skurðdeplinum. Hann verður tískil alt fyri eitt settur frá sum leiðandi yvirlækni. Hann heldur tó áfram sum vanligur yvirlækni og sjúkrahúsleiðslan hevur fráboðað honum eina ávaring um at rætta seg eftir leiðsluavgerðum framyvir. Ávaringina kann hann gera viðmerkingar til í seinasta lagi 21. november, verður sagt í tíðindaskrivinum.
