Formansskapur
Í grein aðrastaðni í blaðnum í dag, finst Jógvan Sundstein harðliga at framferðini hjá Edmundi Joensen, løgtingsformanni hesar seinastu dagarnar.
Jógvan Sundstein var topp-politikkari í Føroyum í eitt mannaminni og hann var bæði løgmaður, landsstýrismaður og løgtingsformaður í langa tíð.
Og hann sigur, at hann ræðist framferðina hjá løgtingsformanninum og formanninum í uttanlandsnevndini.
Eitt, sum serliga ørkymlar Jógvan Sundstein, er, at Edmund Joensen í samrøðu við Útvarpið segði, at tingfólk atkvøddu ikki eftir síni sannføring.
- Hetta er ein álvarsom skuldseting bæði móti tingmonnum og eisini móti løgmanni, sum formaðurin sigur hava trýst tingmenn at atkvøða fyri sínum uppskoti, sigur Jógvan Sundstein.
Hann sigur eisini, at tá ið tingformaðurin alment skuldsetur tingfólk fyri ikki at fylgja síni sannføring kann hann ikki sleppa við, at hetta bara verður sent út í luftina og síðani gloymt.
- Løgtingslimir eru bert bundnir av sannføring síni, stendur í stýrisskipanarlógini. Tá ið formaðurin skuldsetur sínar limir fyri at bróta hesa lóg, er nakað spinnandi galið, antin við formanninum ella við tingmonnunum.
- Í øllum førum má formaðurin prógva sína skuldseting. Um hann ikki kann hetta eru bert tveir møguleikar eftir. Annar er at biðja um umbering ella at leggja frá sær sum formaður.
Annars sigur Jògvan Sundstein, at hann er skelkaður av orðaskiftinum á Løgtingi í farnu viku.
- At hoyra menn kalla aðrar gleðisgentur , at vilja leggja starvsfelagar inn á psykiatriskar deildir, at sita og rópa eftir røðarum niðri frá tingsalinum, tað hoyrir ikki heima í einum parlamenti.
- Í hvussu so er ikki um okkara leiðir.
- Eg var sjálvur tingmaður í 24 ár, men líknandi galimatias minnist eg ikki, sigur Jògvan Sundstein.
Edmund Joensen, løgtingsformaður, hevur onga viðmerking til Jógvan Sundstein.
- Jógvan Sundstein sigur og mangt, er einasta heilsanin frá løgtingsformannium til gamla starvsfelagan.
