Í gjár varð almannakunngjørt, hvørjir sangir sleppa við í Söngvakeppni Sjónvarpsins í Íslandi. Tilsamans 174 sangir komu inn til kappingina, og ein dómsnevnd hevur valt 15 burturúr. Ein av teimum eigur Jógvan Hansen saman við Vignir Snær Vigfússon.
Sostatt verður Jógvan við triðja árið á rað, tá fremstu sang- og tónleikanøvn í Íslandi fara at kappast um at sleppa at umboða Ísland, tá stóra evropiska finalan verður í Týsklandi í mai mánaði komandi ár. Og ikki er óhugsandi, at Jógvan Hansen enn eina ferð verður millum tey fremstu.
Í fjør vóru bara nakrar og tjúgu atkvøður á muni millum hann og vinnaran, Jóhanna Guðrún, sum í evropisku finaluni vann Íslandi eitt flott annaðpláss. Jógvan sang í fjør sangin, »One More Day«, sum Bubbi Morthens hevði skrivað, og í fyrraárið bleiv Jógvan nummar fýra við sanginum, »I Think The World of You«.
Sigast má, at væl liggur fyri hjá Jógvani at gera um seg sum sangari í Íslandi. Síðani hann í 2006 vann íslendsku útgávuna av X Factor-kappingini, tá hann fekk 70 prosent av atkvøðunum, hevur hann javnan verið frammi í sambandi við bæði framførslur, útgávur og – sum nú – kappingar.
