- Vit hava tosað við fyrireikararnar av festivalinum, og alt er so at siga komið í rættlag. Og sjálvur vóni eg í øllum førum, at hetta fer at bera til.
Soleiðis sigur Jógvan Hansen, sum fríggjakvøldið vann stóru íslendsku sangkappingina, X-factor. Jógvan er sjálvur klaksvíkingur, og hann hevur eisini eina ferð áður staðið á pallinum á Vágsbøi. Hetta var fyrsta festival-árið, tá Jógvan var partur av framførsluni hjá Hjarnum.
Ta ferðina stóð hann tó fyri tað mesta í bakgrundini við mjúku røddini, men hesa ferð trínur hann av álvara fram í fremstu røð. Hvussu sangskráin til festivalin fer at síggja út, vita vit ikki enn. Men saman við Jógvani kemur eisini Húsaorkestrið hjá X-factor, og tí er væl hugsandi, at talan verður um fleiri av løgunum, sum Jógvan so væl framførdi í kappingini. Eitt nú “Let Me Entertain You” hjá Robbie Williams og “It’s My Life” hjá Jon Bon Jovi.
