? Tað var rætt ikki at taka uppaftur tætta samstarvið við tingbólkin hjá danska Javnaðarflokkinum.
? Kravið um eina rættvísa loysn av bankamálinum og føroyska skuldarspurninginum hevur viðvirkað til, at hetta er hent,
? og uppskotið hjá Javnaðarflokkinum um nýggja sjálvstýrisskipan fer nú at fáa eina djúptøkna politiska viðgerð.
Hetta er ein partur av tí, sum Jóannes Eidesgaard, formaður Javnaðarfloksins og fólkatingsmaður hevur fingið burtur úr landsstevnuni hjá Javnaðarflokkinum. Hann hevur tí sent út eitt tíðindaskriv, har hann kunngerð, at hann ikki fer at vera við til at fella eina danska Javnaðarstjórn. Jóannes Eidesgaard fer kortini at halda seg uttan fyri danskan innanríkispolitikk, og hann fer at virka sum eitt sjálvstøðugt føroyskt umboð á fólkatingi.
Í yvirlýsingini sigur Jóannes Eidesgaard, at hetta staðfestir, at nú eru skapt nýggj politisk viðurskifti, og tí ber til at byggja uppaftur samstarvið millum danska og føroyska Javnaðarflokkin.
Tann sjálvstøðuga føroyska umboðanin verður varðveitt, soleiðis at samstarvið kann fara fram millum tveir javnsettar partar, og at partarnir í størstan mun ikki blanda seg í innanhýsis viðurskifti hvør hjá øðrum.
? Vit viðurkenna okkara hugsjónarliga støði og okkara altjóða skyldur til at virka fyri breiða út humanistisku sosialismuna, og tær skyldur, hetta arbeiðið inniber.
? Aktuella støðan í fólkatinginum verður best loyst við eini avtalu millum føroysku fólkatingsumboðini um ikki at broyta javnvágina í tí fólkatingið, sum danir hava valt, soleiðis sum løgmaður eisini hevur víst á.
Jóannes Eidesgaard sigur, at kann ein slík avtala - ein clearingavtala - ikki fáast í lag, so vil Javnaðarflokkurin í einstøkum førum gera sítt til at varðveita javnvágina - og á tann hátt neutralisera tær kunngjørdu antisosialistisku agressiónirnar, sum higartil hava eyðkent framførsluna hjá øðrum føroyska fólkatingsumboðnum.
? Ta innbjóðing til eina formalisering av samráðingunum og samstarvinum millum flokkarnar boðar - ávikavist í Føroyum og í Danmark, sum Poul Nyrup Rasmussen, forsætisráðharri hevur borið fram, móttaka vit fegin í føroyska Javnaðarflokkinum, sigur Jóannes Eidesgaard at enda.
