Jens Petur Brattalíð, ferðslusamskipari hjá Strandfaraskipum Landsins, sigur við in.fo í kvøld, at óvist er, um Norrøna fer av Vági í morgin.
- Sambært ferðaætlanini skuldið Norrøna fara suður á Vág klokkan 10 í morgin og av aftur Vági klokkan 16. Men, alt hetta er nú broytt.
Hann sigur, at avgerð er tikin um, at um viðrar, siglir Norrøna av Vági í morgin klokkan 9 og norður á Kollafjørð. Skipið fer síðan av aftur Kollafirði klokkan 12 og suður á Vág.
- Um siglt verður, koyrir bussur av Farstøðini í Havn klokkan 11.30 og norður til Kollafjarðar og ferðafólk, sum koma við Norrønu úr Suðuroy, sleppa eisini við bussi aftur til Havnar.
Jens Petur Brattalíð er í kvøld ivingarsamur um, hvussu morgindagurin verður, og hvussu verður við siglingini hjá Norrønu.
- Lýst verður um hetta í útvarpinum longu klokkan 07, klokkan 07.30 og klokkan 08, leggur hann aftrat.
Ferðslusamskiparin sigur, at aldan eystan fyri í løtuni er stívliga níggju metrar høg, og vestan fyri er hon 8,20 metrar.
- Vit kunnu vænta, at hann verður landsynningur eystan í morgin, umleið 18-20 metrar um sekundið, sigur Jens Petur Brattalíð.
Teistin avlýsti teir seinnu túrarnar millum Skopun og Gomlurætt í kvøld, og eisini varð túrurin hjá Ternuni úr Havn og út til Nólsoyar klokkan 22 í kvøld avlýstur.
Hinvegin hava Bygdarleiðir koyrt sum vanligt í allan dag.
