Fyri stuttum lat ÍSF eina tørvsmeting til landsmyndugleikarnar. Í hesi varð lýst, hvussu góðar ella vánaligar umstøðurnar eru innan ymsu ítróttagreinarnar, og víst var á, hvussu stórur íløgutørvurin er, um nøktandi umstøður skulu fáast í lag.
Í dag hevur ÍSF-forseting, Petur Elias Petersen, sent út tíðindaskriv, har hann vísir á, at tað í mong ár als ikki hevur verið samsvar millum tørv og játtan til ítróttin.
Lesið eisini: ÍSF vil hava nýtt hús
-Í 2008 gjørdi ÍSF eina kanning av virðinum av samlaða sjálvbodna arbeiðinum í føroyskari ítrótt. Sjálvbodna arbeiðið varð tá mett at vera 46 milliónir krónur. Verða hesar 46 milliónir krónur samanbornar við tær uml. 7 mió. kr. sum ÍSF fær á løgtingsfíggjarlógini um árið, sæst týðiliga, at samsvar als ikki er millum tørv og játtan, sigur Petur Elias Petersen, forseti í ÍSF,
Í tørvsmetingini, sum er latin almennu myndugleikunum, verður millum annað víst á, at tað er neyðugt at byggja nýtt ÍSF hús, at játtanin til virksemið hjá sersambondunum eigur at hækka og at fleiri pengar mugu setast av til ÚRVAL skipanina og altjóða puljuna.
Lesið eisini: Eingin ítrótt uttan íløgur
-Felagsskapur okkara er væl og virðiliga grundaður á góð og sunn virði, sum hava týdning fyri alt Føroya fólk Játtanin til ÍSF er ikki ein útreiðsla á fíggjarløgtingslógini. Játtanin til ÍSF er ein íløga í vælveruna. Eisini er hetta ein íløga í ein felagsskap, sum við stoltleika, roysni og brøgdum umboðar Føroyar í altjóða høpi. Tað er neyðugt við einari hægri játtan, soleiðis at vit megna at møta krøvunum, sum nútíðin og framtíðin setir okkum, heldur Petur Elias Petersen.
