Fyrrverandi forsætisráðharrin fekk játtandi svar upp á umsókn um at verða royndarleyslatin og er farin úr geglinum.
Fyrrverandi ísraelski forsætisráðharrin, Ehud Olmert, er í dag royndarleyslatin eftir at hava sitið fongslaður fyri mutur.
Olmert varð í fjør dømdur 19 mánaðir í fongsul í stórum muturmáli. Hann varð fyrr dømdur 27 mánaðir í fongsul við annan dómstól, men dómurin varð síðani linkaður.
Ehud Olmert, sum er tann fyrsti fyrrverandi forsætisráðharrin í Ísrael, sum hevur sitið fongsulsdóm, hevði onga viðmerking til fjølmiðlafólk, tá hann fór úr Maasiyahu-fongslinum.
Tann 71 ára gamli Ehud Olmert var forsætisráðharri frá 2006 til 2009. Hann hevur sitið fongslaður síðani februar í fjør.
Hann varð dømdur í fongsul eftir at vera funnin sekur í tveimum ákærum um at hava tikið ímóti mutri fyrst í 00'unum.
Hann varð funnin sekur í at hava tikið ímóti 60.000 shekel, sum er umleið 105.000 krónur, stóð í endaliga dóminum hjá hægstarætti.
Umsóknin um at verða royndarleyslatin varð gingin á møti hósdagin. Og tá ákærumyndugleikin ikki kærdi avgerðina, er Olmert nú fríur maður.
Ehud Olmert bað um at vera loystur úr embætinum sum forsætisráðharri í 2008. Tað hendir, eftir at løgreglan hevði mælt til, at ákæra varð reist ímóti honum.
Hann var tó sitandi til mars í 2009, tá leiðarin í Likud-flokkinum, Benjamin Netanyahyu var tikin í eið sum nýggur forsætisráðharri í Ísrael.
Olmert er nógv róstur fyri sín lut í arbeiðinum at endurbyrja friðartilgongdina við palestinar í 2007.
Verk hansara hevur tó ikki borið ávøkst, og muturgølan hevur spilt politiska eftirmæli hansara.
/ritzau/AFP
