– Í hesum órógvandi og truplu døgum sendir ÍSF sín treytaleysa samhuga og stuðul til ukrainska fólkið.
Soleiðis sigur ÍSF í skrivi í dag. Víðari stendur:
– Bæði tey, sum nú liva við ótta og óvissu í álopna heimlandinum - og tey, sum við ótta og óvissu flýggja undan russiskari og hvítarussiskari hermegi. ÍSF fordømir álop Russlands og Hvítarusslands á Ukraina. Tað eigur at fáa stórar fylgjur - eisini fyri russiskan og hvítarussiskan ítrótt.
ÍSF vísir á, at virðini, sum allur ítróttur byggir á, eru felagsskapur, friður og kapping á jøvnum føti.
– Sterka megin, sum býr í ítrótti, røkkur um allan heimin og knýtir okkum saman. Sama hvussu ymisk vit eru, sama hvar vit búgva, hvat vit trúgva og hvørjar sannføringar, vit annars hava, savnast vit í ítróttinum.
– Harðskapur og krígsgerðir, sum vit í hesum døgum síggja í Ukraina, kunnu tí á ongan hátt sameinast við ítróttin, sigur ÍSF.
– Vit vóna, at endi kann fáast á stríðnum á skilagóðan hátt, áðrenn fleiri mannalív so meiningsleyst verða mist, og áðrenn fleiri fólk mugu flýggja frá øllum, tey eiga.
Inntil stríðið endar, mælir ÍSF til, at:
- Eingi ítróttafólk fara til kappingar í Russlandi ella Hvítarusslandi
- Eingi ítróttafólk úr Russlandi ella Hvítarusslandi sleppa at luttaka í okkara kappingum
- Eingi umboð fyri russiskan ella hvítarussiskan ítrótt sleppa at luttaka í føroyskum tiltøkum, fyriskipanum ella avtalum
- Eingi føroysk ítróttarumboð taka lut í russiskum ella hvítarussiskum tiltøkum, fyriskipanum ella avtalum
ÍSF sigur til síðst:
– Øll norðurlendsku ítróttasambondini standa saman um at fordøma Russland og Hvítarussland - og at útihýsa russiskum og hvítarussiskum umboðum, nevndarlimum og ítróttafólki. Føroysku umboðini á altjóða pallunum virka eisini fyri og stuðla hesi útihýsing. Somuleiðis samskifta vit støðugt við hini norðurlendsku ítróttasambondini um, hvørt átøkini móti Russlandi og Hvítarussandi - og ítróttinum í hesum londunum - skulu herðast.
