Myndugleikarnir í Iran kunngjørdu í dag, at landið hevur royndarskotið nakrar rakettir, sum kunnu raka mál í Ísrael, og at roynirnar eydnaðust væl. Sjónvarpsstøðin Press TV, sum er á enskum máli, sigur, at talan er millum annað um rakettir av slagnum Shahab-3, sum bera 1.300 kilometrar.
-Høvuðsmálið við royndini er at vísa tann politiska viljan hjá tí iranska fólkinum til at verja týðandi virðir og tjóðarinnar áhugamál, sigur generalurin Hossein Salami, sum er næstovasti fyri kollveltingarhirðini.
Ísrael hevur fyrr sagt, at tað kann koma upp á tal at søkja at Iran, um diplomatiskar royndir at loysa ósemjuna um ta iransku kjarnorkuverkætlanina ikki bera á mál. USA hevur sagt, at tað vil ikki útihýsa møguleikanum fyri álopi á Iran.
