Visiónin um at bilarnir sjálvir kunnu bremsa og kanska eisini koyra uttan um, tá ein samastoytur er óumgongiligur, kom eitt stig nærri í 2005. Nakrir av nýggjastu bilunum eru so framkomnir, at teir aktivt hjálpa bilføraranum at umgangast ferðsluvanlukkur. Bilførarin hevur tó fullu ábyrgdina av sínum bili.
Bæði Toyota/Lexus og Mercedes-Benz hava longu nú bilar á marknaðinum, sum kunnu varnast ein vanda, gera bilin kláran til ein samanstoyt og í ein vissan mun bremsa sjálvir. Volvo eru eisini komnir langt á hesi leið.
Mercedes-Benz hava eitt system, ið kallast "Presafe", ið virkar soleiðis at um bilurin við hjálp av ABS- og ESP-skipanunum registrerar at nakað er áfatt, verða t.d. strammararnir í trygdarbeltunum aktiveraðir, opnir rútar latast aftur og bremsurnar verða settar í tilbúgvingarstøðu. Á nýggjasta S-klassanum hjá Mercedes-Benz er skipanin víðkað við einum radara, so bilurin sjálvur kann boða frá, at ein samanstoytur nærkast og geva føraranum eina ávarðing. Um bilførarin ikki traðkar fast nokk á bremsupedalin, økir bremsuskipanin sjálv um bremsutrýstið.
Toyota hava eitt líknandi system á nýggjastu Lexus-bilunum, og á modellum ið einans verða seld í Japan, eru teir farnir eitt stig víðari við tað at um bilførarin í eini tilbúgvingarstøðu byrjar at bremsa hóvliga, vil bilurin taka yvir og bremsa við fullari megi. Um bilførarin als eini ger, vil bilurin til síðst bremsa av sær sjálvum, men tá kann tað sjálvandi vera ov seint.
