Ein stórur partur av hansara floksfelagum fóru, tá til Havnar í skrivstovulæru bæði í bankar og á almennar stovnar, ikki kann sigast annað enn at hetta hevur verið ein góður árgangur at skúlanæmingum, nógv teirra sita í góðum størvum í dag. Hesi ungu hildu nógv saman hesi árini í Havn, tá í tíðini var øðrvísi ferðasamband, sum viðførdi at tey ungu leigaðu sær kamar og fóru bert heim í vikuskiftinum.
Nøkur av hansara vinfólkum búgva framvegis Havn, meðan fleiri teirra hava fingið starv aftur í Eysturoynni og er Ingolf ein teirra.
Ingolf flutti inn aftur í Eysturoynna í 1973 har hann 1. januar 1973 bleiv settur sum deildarleiðari á Gjaldstovuni í Saltangará, sum bleiv sett á stovn 7. februar 1966, tá vóru tey bert 3 starvsfólk. Sum leiðari skuldi Ingolf eisini eitt skifti røkja uppgávuna sum tollari í økinum, til ein tollari bleiv settur burturav til hesa uppgávu nøkur ár seinni.
Í 1988 blivu tey 6 starvsfólk tá 2 næmingar komu í læru á deildini. Í 1988 broytti stovnur navn til Føroya Tollstova, tollumsitingin bleiv tikin burturúr Føroya Gjaldstovu og í 1993 bleiv enn ein broyting gjørd tá skattaumsitingin bleiv løgd saman við tollinum og fekk stovnurin enn eina ferð nýtt navn til Toll- og Skattstova Føroya. Øll henda broyting hevur kravt nógv av einum leiðara, men so stillførur sum Ingolf er, hevur hann duga væl at umstilla seg, hann er væl fyri á tí fakliga økinum, hevur gingið nógv ár á Handilsskúl¬anum um kvøldarnar og eitt skifti arbeiddi hann hjá Sp/f Grannskoðarastovan á Skála, eisini hevur hann sitið í Líkningarnevndini í Runavík. Hetta hevur givið honum góðan førleika fyri at klára tær nýggju avbjóðingarnar í arbeiðinum so væl, hansara deild var ein tann best umsitna hjá stovninum. Ingolf dugir væl at umgangast bæði kundar og starvsfólk, fleiri hava arbeitt har í nógv ár, í dag starvast 31 fólk á deildini.
Vit ynskja honum og familju hansara hjartaliga tillukku við 40 ára starvsdegnum.
