Tað vísti seg, at Kristin Michelsen skulkaði mest. Hann var burtur frá 16 av 42 tingfundunum hesa tingsetina fram til jóla.
Men hann lovaði at taka annað skinn um bak.
Og tað hevur hann gjørt. Hann hevur møtt á hvørjum tingfundi síðani – uttan í gjár. Men tá gjørdi hann, sum hann eigur: hann bað um farloyvi, so næsta fólk á listanum kundi møta.
Men aðrir tingsessir hava staðið tómir – eitt nú hjá Fólkaflokkinum.
Og tá tingsessir standa tómir – so kann man spyrja, hvar tingfólkini eru. Í so máta er Facebook nokso avdúkandi. Tí har sást herfyri, at Rodmundur Nielsen, løgtingsmaður, var á country-ferð í Nashville USA saman við country-fjepparum sum t. d. Johan Dahl, landsstýrismanni og onkrum týdningarmiklum aktøri í vinnulívinum. Men hann helt tað ikki vera neyðugt at fáa varamannin Boga Andreasen á ting.
Og nú tá ungi tingmaðurin Hanus Samró – eisini sambært Facebook – hevur hugnað sær í Keypmannahavn og nú sólar sær í Dubai, so hevur hann heldur ikki viljað havt Boga Andreasen á ting. Av teimum 11 tingfundunum í ár hevur hann forsømt fimm fundir higartil. Og hann fær fulla løn, tá hann ikki kallar varamannin inn.
– Vit spyrja bara: Hvar er respektin fyri tingarbeiðinum og fyri veljarunum?
