Sum støðan er nú, hava vit ikki fíggjarligt rásarrúm til at geva fólki við lágum- og miðalinntøkum, ein skattalætta.
Tað staðfesti Bárður á Steig Nielsen, tingmaður fyri Sambandsflokkin, og formaður í fíggjarnevndini.
Í áðni varð hann spurdur um samgongan ætlaði at hala lyftið um at lækka skattin á lágum inntøkum og miðalinntøkum.
Tað var eitt lyfti, samgongan gav í kjalarvørrinum á avgerðini um at seta flatskattin í gildi, tí tann skipanin gevur teimum høgu inntøkunum eisini tann størsta skattalættan.
Men tað hevur drigið út við at fremja hendan skattalættan. Men fleiri ferðir hava tinglimir í samgonguni havt hug at draga í land. Ístaðin hava tey sagt, at skal skattalætti latast teimum lægru inntøkumum, mugu kommunurnar taka um endan, tó fólk við lágum inntøkum, rinda so lítið í landsskatti.
Og í morgun staðfestir Bárður Nielsen, at í løtuni er ikki fíggjarligt rásarrúm at lata ein skattalætta.
Eisini hann staðfestir, at tað hjálpr ikki nógv, at lækka landsskattin hjá fólki við lágum inntøkum, tí tey rinda so lítið í landsskatti.
- Ein inntøka á 200.000 krónur, rindar bara 27.000 krónur í landsskatti um árið, sigur Bárður á Steig Nielsen.
- So kunnu vit halda um tað er nógv ella lítið, staðfestir hann. Men sleppur ein, sum forvinnur 16.000 krónur um mánaðin, heilt undan at rinda landsskatt, fær viðkomandi 2.500 krónur í skattalætta um mánaðin.
Hinvegin lovar Bárður á Steig Nielsen, at so skjótt tað ber til, er ætlanin eisini at lækka skattin hjá fólki við lágum og miðalinntøkum.
