ÍF dragnaði í gullstríðnum

Tað var grannauppgerð í góðveðrinum í Leirvík í kvøld. Teir næstbestu hjá Víkingi høvdu uppi á Brekku vitjan av ÍF, og tað endaði 1-1, sum eisini var hálvleiksstøðan.

Hagtølini siga, at ÍF hevði átta royndir á og framvið heimamálinum, og at Víkingur hevði sjey royndir á og framvið ÍF málinum. Víkingur vann átta hornaspørk, og ÍF vann trý hornaspørk.

Eitt korter var farið, tá ið Jákup Andrias Thomsen legði heimaliðið framum. 18 ára gamli Jákup Andrias Thomsen hevur verið millum teir drúgvastu á næstbesta liðnum hjá Víkingi í ár, og hetta var triðja ferðin, at hann var málskjútti.

Síðstu ferðirnar hava Ari Olsen og Finnur Justinussen verið nógv á næstbesta liðnum hjá Víkingi. Tað vóru teir ikki í kvøld. Teir eru nú bara í besta hópinum.                                                                          

Í 27. minutti javnaði ÍF til 1-1. Málskjútti var Jóhan Petersen. Hetta var fimta málið, sum Jóhan Petersen skorar í næstbestu deildini í ár.

Tá ið ÍF 12. mai hevði vitjan av Víkingi, var úrslitið eisini 1-1. ÍF er næstfremst við 30 stigum. TB er topplið við 33 stigum. Bæði ÍF og TB hava spælt 13 dystir. Víkingur er á triðja plássi við 24 stigum fyri 14 dystir.

Dómarin hevði gula kortið á lofti átta ferðir í kvøld. Fimm víkingar sóu gult, og tríggir ÍF spælarar sóu gult.

Víkingur – ÍF 1-1 (1-1)

1-0: Jákup Andrias Thomsen 15.

1-1: Jóhan Petersen 27.

Dómari: Rani A. Skaalum

-

-

Fríggjadagin

HB – Undrið FF: Jón Tór Baldvinsson kl. 20.15

B36 – KÍ: Heini Ziskason Viðoy kl. 20.00

Leygardagin

TB – B71: Bjarki Danielsen kl. 17.00

Mánadagin

07 Vestur – ÍF: Áki Leitisstein Hansen

Týsdagin

NSÍ – Undrið FF: Árni Brandsson Petersen

B71 – KÍ: Jákup Øssursson Mohr kl. 19.30