Ian Smith var føddur í Rhodesia, sum Zimbabwe tá æt, og hann var leiðari hjá tí hvíta minnilutanum har, tá Bretland í sekstiárunum slepti sínum hjálondum í Afrika og aðrastaðni.
Bretland var eisini sinnað at lata Rhodesia fáa sjálvstýri, men við teirri treyt, at landið bleiv skipað eftir demokratiskum reglum. Tað hevði borið við sær, at tann svarti meirilutin hevði fingið valdið, og tað vildu Ian Smith og tey hvítu undir ongum umstøðum góðtaka. Úrslitið varð, at í 1965 kunngjørdi Ian Smith, at Rhodesia var leyst frá Bretlandi.
Í 14 ár stýrdu Ian Smith og stjórn hansara Rhodesia. Øll árini lá stjórnin í støðugum bardaga við uppreistrarfelagsskapir, og endin varð, at Rhodesia fekk meirilutastýri í 1979 og broytti navn til Zimbabwe.
Ian Smith var limur í zimbabwiska tjóðartinginum til 1987. Seinni flutti hann til Suðurafrika, og tey seinnu árini kom hann ofta við hvøssum atfinningum móti Robert Mugabe, forseta.
