Í øðini inn á Chelsea

Fyrr í vikuni var tað næstan fyri vist, at Chelsea skuldi keypa eina av argentinsku HM-hetjunum fyri næstan eina milliard krónur. Í dag er greitt, at Enzo Fernandez ikki verður seldur og tað hevur fingið øðið í leiðsluna í Benfica.

Sambært forsetanum, so hevur Chelsea bara órógvað høvdið á spælaranum við at fara í samráðingar, fyri síðani ikki at vilja rinda veruliga prísin til Benfica.

- Tað er virðingarleys mótivegis okkum øllum, sum eitt felag hevur gjørt. At lata sum um, at tú ætlar at rinda ásetta prísin og samráðast við spælaran, fyri síðani at koma og samráðast við okkum, sigur venjarin hjá Benfica, Roger Schmidt.

Ítróttarstjórin, fyrrverandi portugisiski landsliðsspælarin Rui Costa, er siteraður fyri at siga, at prísurin er 892 milliónir krónur, sum svarar til 120 milliónir evrir. Chelsea skal hava boðið 630 milliónir krónur og spælarar í býti.

Enzo Fernandez bleiv valdur til besta unga spælara til HM-endaspælið í Katar. 21 ára gamli argentinski miðvallarin spælir við Benfica í Portugal. Í løtuni eru ikki fleiri samráðingar millum Benfica og Chelsea skrivar Fabrizio Romano, italskur ítróttarskrivari.

Chelsea tapti í gjár 1-0 móti Manchester City. Hartil blivu Raheem Sterling og Christian Pulisic skaddir. Fyri Manchester City var sigurin týðandi í gullstríðnum við Arsenal.