DM-gull
Sunnudagin kundu sjónvarpshyggjarar hjá TV3 síggja ein óvanliga kenslubornan Flemming Østergaard. Tá dómarin bríkslaði fyri seinastu ferð, og meistaraheitið var veruleiki, fingu kenslurnar frítt at fara. Stóri maðurin lat tárini rulla niður eftir andlitinum, og duldi heldur ikki fyri, at talan við hesum hevði verið um ein dreym, sum nú var runnin út.
- Tað er einki at siga til, at sunnudagurin var serligur, segði Østergaard, tá vit skiftu orð við hann eftir seinasta dystin.
- Alt tað, sum eg havi arbeitt við seinastu fýra árini, riggaði brádliga saman. Tað var eins og hesi fýra árini runnu fram fyri mær aftur.
- Dagurin í dag er tó eisini stórur. Vit hava jú fingið steyp og gullmerki, og tað eru sjálvandi sear fegnir um.
Ikki av løttum
Hóast meistaraheitið nú er heima, so heldur stjórin í felagnum tó ikki, at nøkur orsøk er at hvíla á rósunum, sum nú eru at hóma,
- Nei, tað kunnu vit sjálvandi ikki. Hjá okkum er bara at njóta nú?ið, og so mugu spælararnir sleppa í summarfrí. Vit hava jú stórar uppgávur komandi ár, og skulu millum annað út í Europa at spæla.
Tað er tó ikki bert á ítróttarliga økinum, at Flemming Østergaard ætlar, at felagið framvegis skal verða sjónligt. Tey fýra árini, sum hann hevur verið í felagnum, eru karmarnir broyttir heilt nógv.
Eitt stórt virki
Seinastu tíðina hevur verið tosað um enn fleiri víðkanir. Millum annað sigst ein sjónvarpsstøð at vera ávegis, men hesi tíðindi verða so ikki váttaði av Østergaard.
- Tað er soleiðis í Danmark, at um tú hevur ætlanir um at gerast størri, so skalt tú geva Fondsbørsini boð fyrst, so tað fái eg ikki svarað. Tað stutta av tí langa er tó, at tey, sum kenna meg og FCK, tey vita av, at tað eisini framyvir fer at henda nakað alla tíðina.
- Talan verður tó ikki um nøkur fantasiprojektir av nøkrum stað, men tað sum vit plaga at rópa kontrolleraður vøkstur.
- Tað, sum vit hava sýnt seinastu árini á vinnuliga økinum, hevur so ikki verið heilt býtt. Fyri á leið trimum árum síðani hevði felagið eitt virði upp á einar fimm milliónir. Í dag verður tosað um eina hálva milliard, so vit hava í øllum førum nógv at vera errin um.
- Sum eg segði í áðni, so hava vit tó ikki tíð at taka okkum av løttum, samstundis sum vit siga øðrum, hvussu dugnalig vit eru. Tað er nú, tá vit eru komin á toppin, at vit skulu sýna dugnasemi. Tað snýr seg um at prógva hetta, meðan vit eru á oddinum, og tá mótgongdin kemur. Tí taki eg tað ógvuliga róligt nú, og royni bara at byggja víðari á okkara sonevnda »succes«, sigur Flemming Østergaard at enda.
