Um ein kom við einum tilmæli um at flyta løgmansskrivstovuna í framsleiðsluhølið hjá Føroya Fiskavirking, tí har er pláss fyri tí, ella um ein kom við einum tilmæli um at lata neyt ganga í fólkaskúlanum, høvdu tey verði kveistrað burtur.
Hesi tilmæli høvdu yvirhøvur ikki verið viðgjørd. Tí tey eru ikki seriøs.
Líka lítið seriøst er tilmælið um at niðurleggja stovnin í Pætursgøtu 3 og lata búfólkini har búgva á stovni saman við evnaveikum fólki. Hvat hava fólk við Aspergers syndromi felags við evnaveikum fólki?
Onki.
Hettar vísir bert á manglandi fakliga vitan hjá teimum, sum eru komin við tilmælinum frá Nærverkinum. Har er tað onkur sum hevur uppiborið eina nøs. Ella eina sigar.
Eg eri ikki í móti sparingum og at trimma umsitingina, men lat allar broytingar byggja á fakliga undirbygdar grundgevingar, ikki bert fíggjarligar grundgevingar.
Lat endamálið við einari broyting verða eitt betri tilboð til brúkaran. Um ein so eisini kann spara pengar í hesari tilgongd, er tað ein vinn vinn støða.
