Nú verður tað fyrsta dagin, at fyrsta arbeiðið í sambandi við at gera ein nýggjan Hvalbiartunnil, verður boðið út.
Tað sigur Henrik Old, landsstýrismaður í samferðslumálum.
Fyrsta arbeiðstøkan er at gera vegin í sambandi við tunnilin, hvalbiarmegin, har góðir tveir kilometrar av nýggjum vegi skulu gerast. Annars er ætlanin at byrja upp á sjálvan tunnilin fyrst í næsta árið, men tá skal vegurin vera komin so mikið langt, at setast kann á at bora.
Landsstýrismaðurin sigur, at nú verður umhugsað, hvussu arbeiðið at gera vegin, verður boðið út. Hann sigur, at verður vegurin boðin út nú, verður skotbráið at gera hann, so mikið gott, at eisini smærri arbeiðstakarar áttu at at havt ein møguleika at bjóða seg fram. Spurningurin er eisini um vegurin skal bjóðast út alment, ella ímillum arbeiðstakarar í Suðuroy.
Annars er uppskotið um at gera sjálvan tunnilin eisini á veg í Løtingið. Í løtuni er tað til løgfrøðiligan gjøgnumlestur í Landsstýrinum, so skal tað fyri ein landsstýrisfund, og so verður tað lagt fyri Løgtingið. Endamálið er at fáa Løgtingið at samtykkja arbeiðið at gera Hvalbiartunnilin, áðrenn farið verður í summarfrí í apríl, ella í mai, sigur landsstýrismaðurin.
Hann sigur, at sum liggur í kortunum, skal tunnilin vera liðugur at taka í brúk um ársskiftið 2021-2022. Tilsamans kunnu í mesta lagi 272 milliónir krónur brúkast við arbeiðið. Sjálvur tunnilin verður einar 2,5 kilometrar langur og gongur úr Niðastabotni í Nesi í Hvalba og kemur út aftur undir Gjánhomrum Trongisvági.
Henrik Old sigur, at endamálið var at fáa tunnilin at liggja so lágt sum gjørligt. Og hann heldur at tað hevur eydnast, tí hann sigur, at tað verður at kalla púra slætt allan vegin at koyra. Ongin brekka í sambandi við tunnilin er líka brøtt sum brekkan úr rundkoyringini í Kollafjarðardali, niðan í Kollafjarðartunnilin, fyri at taka eitt dømi at samanbera við, sigur hann.
Hann leggur afturat, at lagt er eisini upp fyri, at Hvalbiartunnilin skal kunna taka alla ferðsluna ið verður, tá ið Suðuroyartunnilin kemur eina ferð í tíðini.
Tað hevur verið tosað um at knýta arbeiðið at bora nýggjan tunnil til Fámjins upp í hesa verkætlanina, men Henrik Old sigur, at Fámjinstunnilin er ikki beinleiðis við í verkætlanini. Kortini er uppskotið orðað soleiðis at tað ber til at taka ein Fámjinstunnil upp í, verður politisk undirtøka fyri tí.
