Sendararnir vórðu skotnir í nebbafiskarnar úr tyrlu. Tyrlan fleyg lágt uppi yvir og dúkkaði, tá ið hvalurin kom undan. Hetta gekk fyri seg fýra dagar í tíðarskeiðnum frá 11. til 26. juni.
Tað eydnaðist væl at fáa sendararnar festar, men teir vóru ov veikir og megnaðu ikki at senda. Bert ein hvalur sendi heim eitt stutt tíðarskeið, sigur Dorete Bloch.
Hon leggur aftrat, at okkurt eisini hevur verið í ólagi við fylgissveininum, tí hesin hvalurin sendi bert fýra ferðir. 21. og 24. juni, og 3. og 6. juli.
Royna av nýggjum
Djórasavnið hevur fingið fýra aðrar sendarar, ið eisini skulu festast á nebbafiskar. Tað kemur ein serfrøðingur á vitjan í næstum, sum skal festa hesar sendarar.
Teir hava verið royndir í Íslandi við stak góðum úrslitum. Talan er um smáar sendarar, ið gjørdir eru at virka einar fimm vikur, sigur Dorete Bloch.
Sendararnir skulu skjótast í nebbafiskarnar úr Tjaldrinum. Húðroyndir verða tiknir samstundis. Tað er Namco, ið hevur bílagt hesa kanningina úr Føroyum. Líknandi kanning verður gjørd í Noregi, Íslandi og Grønlandi.
