Onkur hevur tosað um »Target Fólkaflokkurin« – at Poul Michelsen skal vísa ráðandi monnunum í Fólkaflokkinum, at hann er tann sterki, sum veruliga kann hótta Fólkaflokkin.
Hesum vísir Poul Michelsen sum vera man aftur. Men um hann vil tað ella ikki, so er vandin stórur fyri einum svíðandi ósigri hjá Fólkaflokkinum.
Javnaðarflokkurin fekk ein ordans avsmurning í 1994, tá Verkamannafylkingin, sum fyri ein stóran part varð mannað við fólki, sum vóru misnøgd við Javnaðarflokkin og tí fegin sóu, at Javnaðarflokkurin fór at líða ein knúsandi ósigur. So var, flokkurin fór í knús, og nú 17 ár seinni hevur flokkurin ikki vunnið tað mista innaftur.
Tað er tí ikki løgið, um Jørgen Niclasen og hansara menn rista í brókunum. Á Rás2 í gjár segði Jørgen Niclasen, at tað var broytingin við einum valdømi, sum gjørdi, at Poul Michelsen hevði brúk fyri at markera seg. Hvør skal siga, har var einki innrømmilsi um, at Fólkaflokkurin kanska svíkur liberalu idealini. Ella ger hann nú tað?
Fleiri fólkafloksfólk hava verið »mistonkt« fyri at ætla sær at fara við Poul: Ein er Rodmundur Nielsen, sum tó hevur svorið Fólkaflokkinum trúskapareið á landsfundi. Hann er í løtuni varatingmaður fyri Óla Breckmann, varatingmann, sum ikki hevur havt sæti síðani 1. desember í fjør. Ein annar er Heðin Zachariassen, sum eisini er varatingmaður fyri Fólkaflokkin. Ein triðja, sum hevur verið nevnd, er sera dugnaligi politikarin og stjørnuskotið hjá Fólkaflokkinum, Annika Olsen.
Hvussu leikur fer, fáa vit at síggja. Hetta eru bara leysasøgur og gitingar. Men tað er ikki óhugsandi at ímynda sær, at onkur annar – enn Poul Michelsen – er misnøgd/ur við liberala profilin hjá Fólkaflokkinum. Og eitt er vist, at tey, sum fara við Poul, tey fara frá onkrum øðrum. Tí tað sum Poul fær, tað missir onkur annar. Og Poul fær fólk, tað er vist. Hjá okkum á síðulinjuni er hetta eitt spennandi projekt - og fyri fólkaræðið Føroyar er tað sera áhugavert, um »dunnuhylurin« kann víðkast við einum konstruktivum og seriøsum íkasti, sum kann spyrjast burturúr. Livst so spyrsts...
