Tað var aftur í dag framúr skiftandi og harvið spennandi, tá ið 5-mannaførini við dreingjum kappaðust í Sandavági.
Aftur í dag vóru tað tríggir høvuðsstaðarbátar, sum stríddust um fremsta plássið, meðan vágsdreingir í Royndini Fríðu aftur í dag endaðu á fjórða plássi.
Jallurin hjá Róðrarfelagnum Knørrur var fremstur fyrstu løtuna í endaspurtinum, meðan Drekin var dragnaður eitt sindur.
Á síðstu metrunum áttu teir umborð á tveimum báðum bátunum hjá Havnar Róðrarfelag – Sílið og Drekin – mestu orkuna. Sílið vann, og tað eydnaðist eisini Drekanum at taka Jallin.
Úrslitið í dag ber við sær, at tað er lagt upp til rimmar finalu á ólavsøku. Sílið hevur 36 stig og Jallurin og Drekin hava 35 stig. Harvið er støðan tann, at tann av hesum trimum, sum verður fremstur á ólavsøku, eisini vinnur FM.
1 Sílið 05.14.00
2 Drekin 05.14.25
3 Jallurin 05.14.40
4 Royndin Fríða 05.18.27
5 Tjaldrið 05.21.14
6 Ørnin 05.22.24
7 Firvaldur 05.28.01
FM støðan
1 Sílið 36
2 Jallurin 35
2 Drekin 35
4 Royndin Fríða 22
