Hoyvíkingar kunnu takka sær sjálvum fyri, at teir ikki annað árið á rað eru við í steypafinaluni hjá monnum í hondbólti. Mikukvøldið vóru teir inni á Skála og spældu seinnu hálvfinaluna móti StÍF, sum undan dystinum hevði ein lítlan fyrimun, tí at teir høvdu vunnið fyrra dystin við einum máli í Hoyvík tvær vikur frammanundan.
Hoyvíkingar omaná
Tað var eitt sera uppsett H71-lið, sum fór á vøllin inni á Skála, og tað tóktist sum um, at teir høvdu gjørt sær greitt, at skuldu teir vinna felagnum nakran heiður í hesum kappingarárinum, so var neyðugt at taka sær um reiggj og stríðast fyri hvørjum bólti.
Hoyvíkingar hava higartil í ár havt stórar trupulleikar av verjuni hjá sær, sum teir hava havt ilt við at fingi skil á. Mikukvøldið var verjan tó sera stinn, og tá ið so Levi Nybo í málinum, samstundis hevði ein heilt góðan dag, sá tað bara heilt gott út hjá gestunum.
Tað var eisini H71, sum fekk bestu byrjanina upp á dystin. Eftir at liðini høvdu fylgst fyrsta korterið, fóru hoyvíkingar eitt sindur frá StÍF seinsta korterið av fyrra hálvleiki, og tað sá út til, at teir kundu lagt seg avgerandi á odda.
Mistu høvdið
StÍF hevði valt at verja við síni vanligu offensivu verju, og serliga var tað á miðjuni, at teir lógu frammalaga á Halgir. Hetta gav tó pláss til stóra Piti Negru, sum var besti maður hjá hoyvíkingum við níggju málum mikukvøldið.
Hinvegin merkti offensiva verjan hjá strandingum eisini, at tað gekk ógvuliga striltið hjá H71 at fáa veruligt glið á álopsspælið hjá sær. Av tí sama gjørdist tað ofta talan um heldur hasaraderaðar málroyndir frá H71, og tað var lætt hjá einum annars vælleikandi Marian í málinum hjá StÍF at taka sær av.
Í hinum endanum vardu hoyvíkingarnir rættuliga flatt, og tað hóskar seg eisini væl, tá ið havt verður í huga, hvussu stórar menn H71 hevur á liðnum. Við monnum sum Piti Negru, Halgir Dahl Olesen, Olaf Vesturgarð og Henrik Gerster í miðverjuni, hevur tú sum álopsspælari ein sannan múr framman fyri tær, um verjan hevur ein góðan dag.
At H71-verjan hevði ein góðan dag, noyddist eitt nú Leivur Justinussen, ið vanliga er ein tann frægasti málskjúttin hjá strandingum. Leivur fekk mikukvøldið bert tað eina málið, og tað var fyrst og fremst H71-verjuni og Levi Nybo í málinum fyri at takka.
Artur vendi dystinum
Hoyvíkingar høvdu munin størsta partin av dystinum, men móti dystarenda komu standingar aftur í aftur. Veteranurin Artur Johansen bleiv sendur á vøllin, og tað vísti seg at verða ein skilagóð avgerð.
Eftir at H71 10 minuttir fyri tíð var á odda við trimum málum, megnaðu strandingar at berja seg upp á javnleik seinastu løtuna og harvið tryggja sær finaluplássið. Artur, sum annars hevði sitið á beinkinum mesta partin av dystinum, var sera avgerandi hesa løtuna. Umframt at hann skoraði tvey av málunum hjá StÍF seinastu tíggju minuttirnar, hevði hann eisini onkra fríspæling til viðleikarar, sum síðani skoraðu og harvið fingu heimaliðið upp á javnt.
At H71 tíðliga miðskeiðis í seinna hálvleiki misti leikandi venjaran, Henrik Gerster, bøtti heldur ikki um støðuna hjá hoyvíkingum. Teir megnaðu snøgt sagt ikki at halda høvdið kalt, tá ið mest stóð á, og tað kostaði teimum sigurin og finaluplássið.
Umstrídd avgerð
Sum áðurnevnt er seinasta orðið um henda dyst neyvan sagt enn, tí H71 hevur kært dystin. Kæran hjá H71 snýr seg um eitt time-out, sum StÍF hevði einar sjey minuttir fyri leiklok.
Bonkurin hjá strandingum gevur dómaraborðinum Time-out kortið, og dómaraborðið roynir við lúðuri at gera dómarunum vart við hetta, men av tí at sera nógvur gangur er í høllini, hoyra teir ikki veika lúðurin. StÍF spælir tí eitt langt álop liðugt, sum endar við, at Levi í H71-málinum bjargar. H71 fer í álop, men nú gerast dómararnir varugir við time-out kravið frá StÍF. Teir tosa við dómaraborðið, sum eisini trýsti á lúðurin, eftir at H71 hevði vunnið bóltin, og avgjørt verður, at strandingar fáa bóltin aftur og nýtt álop. Hetta vóru hoyvíkingar ikki fegnir um, tí teir mettu ikki, at StÍF soleiðis kann fáa eitt nýtt álop ókeypis. Hetta hava teir so kært til kappingarnevndina hjá HSF, og málið verður óivað viðgjørt í næstum.
Hondbóltslógirnar siga: "Floytuljóðið frá tíðtakara/skrivara stegar í prinsippinum dystinum og alt tað, sum hendir eftir hetta verður ógildað, tó undantikið persónligar revsingar. Tað vil siga, at gul kort, útvísingar v.m., sum verða givin í tíðarbilinum millum floytuljóðið og tekini frá dómarunum um at steðga dystinum, verður galdandi"
Spurningurin er so, um dómaraborðið hevur gjørt vart við seg á tann hátt, sum lógirnar hjá HSF krevja, og eisini er spurningurin um tíðina. Tá ið valt verður at bakka dystin aftur til har, sum dómaraborðið markeraði fyri time-out, skal tíðin so eisini bakkast ella hvussu. Undir øllum umstøðum verður málið gjølla viðgjørt av HSF, og so mugu vit bara bíða í spenningi eftir avgerðini hjá kappingarnevndini.
StÍF-H71 22-22(8-10)
StÍF: Sveinur Justinussen 8(2), Artur Johansen 4, Pauli Hansen 3, Alexandur Johansen 2(2), Bent Djurhuus 2, Leivur Justinussen 1, Borgar Danielsen 1, Bárður Danielsen 1
H71: Piti Negru 9, Christian Eli Zachariassen 4(3), Halgir Dahl Olesen 4, Henrik Gerster 2, Høgni Joensen 1, Olaf Vesturgarð 1, Heini Bentsen 1
Brotskøst: StÍF 5(4), H71 6(3)
Útvísingar: StÍF 2, H71 7
Dómarar: Hannis og Uni Wardum
