Tað er longu nú greitt, at í hvussu er tvey lið í næstbestu deildini vera í pottinum, tá ið lutur fer at verða drigin um, hvør skal spæla ímóti hvørjum í fjórðingsfinaluni í kappingini um løgmansteypið.
Í morgin hittast EB/Streymur og 07 Vestur við Margáir, at stríðast um eitt pláss í fjórðingsfinaluni.
Í dag kvalifiseraði Giza/Hoyvík seg at spæla í fjórðingsfinaluni. Liðið í næstbestu deildini átti heimavøll á niðara vølli í Gundadali ímóti B68 í bestu deildini.
Úrslitið var 2-0 til Giza/Hoyvík eftir 1-0 í hálvleikinum.
Bæði málini vórðu skorað í sambandi við deyðbóltsstøður.
Bogi Hermansen setti í fyrra hálvleiki hol á við beinleiðis frísparki, og tíðliga í seinna hálvleiki økti Leivur Holm um leiðsluna, tá ið hann eftir horna frá Boga Hermansen við høvdinum stýrdi bóltin í B68 málið.
Síðstu minuttirnar var Giza/Hoyvík undirmannað, eftir at Leivur Holm hevði sæð gula kortið fyri aðru ferð og harvið varð vístur av vøllinum.
