Hondbóltsfelagið í Kvívík, HC Kvívík, fer í summar at skipa fyri kapping í strandarhondbólti á Leynarsandi. Kappingin verður leygardagin 23. juli frá fyrrapartinum og langt út á kvøldið, og kappast verður bæði við kvinnuliðum, mansliðum og blandaðum liðum.
Reglurnar fyri strandarhondbólt eru eitt sindur øðrvísi enn fyri vanligan hondbólt. Spælararnir eru fýra í tali, tríggir útispælarar og ein málverji, og ikki er loyvt at dribla. Skalt tú vinna ein dyst, skalt tú vinna tveir hálvleikir, so um liðini vinna hvør sín hálvleik, skal dysturin gerast av við brotskøstum.
Maðurin aftan fyri hesa nýggju kappingina er Morten Hust Petersen, sum á gallaveitsluni í Vági leygarkvøldið greiddi stutt frá kappingini og royndi at eggja hondbóltsfólkinum til at taka væl ímóti henni. Hetta slagið av hondbólti kom Morten í samband við, tá hann fyri nøkrum árum síðani starvaðist sum venjari í Ný Sælandi.
