Kroatia hevur í kvøld vunnið á Brasil í HM-endaspælinum í Katar, eftir brotssparkskapping. Talan er um ein HM-skelk, tí Brasil var favorittur at vinna HM. Tó er vert at hava í mentu, at Kroatia var í HM-finaluni í 2018, so talan er um royndar landsliðsspælarar.
Tað var lítil munur á liðunum í fyrra hálvleiki. Brasil hevði bóltin meir, men Kroatia er eitt tekniskt sterk lið, sum væl megnaði at halda upp á bóltin. Báðir partar royndu seg við skotum, men sjáldan var vandi á ferð.
Søgan var tann sama í seinna hálvleiki, men tey flestu mundu vænta, at favorittarnir úr Brasil, fóru at taka yvir. Tað bleiv tó málleyst í vanligari leiktíð. Í longdu leiktíðini kom Brasil á odda í seinasta minuttinum fyri hálvleik.
Neymar byrjaði álopið, sum endaði við at stóra stjørnan á brasilska liðnum rak framvið málverjanum og sendi bóltin upp í nettakið. Tú sást hvussu luftin fór úr fleiri av kroatisku spælarunum, men í stutta steðginum funnu teir megi.
Tí í 116. minutti fór Kroatia í eitt skjótálop, sum endaði við at innskifti Bruno Petkovic skoraði við eitt sindur av hjálp frá einum brasilskum beini, sum kom í vegin. Fleiri mál komu ikki og tí varð farið til brotssparkkapping.
Her brendi innskifti Rodrygo í fyrstu royndini. Síðani skiftust partarnir at skora inntil trýstið var størst á Marquinhos. Tí hann skuldi skora fimta og seinasta sparkið fyri Brasil, men rakti á stongina og út.
Kroatia skal møta vinnaranum av Argentina og Hollandi í hálvfinaluni.
Kroatia – Brasil 0-0 (0-0) 1-1 eftir longda leiktíð
0-1 Neymar, 105
1-1 Bruno Petkovic, 116
*Kroatia vinnur 4-2 eftir brotssparkskapping
